شوبز کو خیرباد کہنے والی ثنا خان نے اپنی شادی کی تصاویر شیئر کردیں

بگ باس سیزن 6 سے مشہور ہونے والی بھارتی اداکارہ ثنا خان نے رواں برس اکتوبر میں مذہب کی خاطر شوبز سے کنارہ کشی اختیار کی تھی۔

اور گزشتہ روز سوشل میڈیا پر ان کی کچھ ویڈیوز بھی وائرل ہوئی تھیں جن میں کہا جارہا تھا کہ ثنا خان نے بھارتی ریاست گجرات سے تعلق رکھنے والے ایک عالم دین سے شادی کرلی۔

اب ثنا خان نے انسٹاگرام پر جاری ایک پوسٹ میں شوہر کے ساتھ تصاویر شیئر کرتے ہوئے اپنی شادی کا اعلان کیا۔

تصاویر میں ثنا خان نے سرخ رنگ کا لباس زیب تن کیا ہے جبکہ ان کے شوہر نے سفید رنگ کا لباس پہنا ہوا ہے۔

انہوں نے لکھا کہ ‘ہم اللّٰہ تعالیٰ کی رضا کی خاطر ایک دوسرے سے محبت کرتے ہیں اور اللّہ کی رضا کے لیے ہی ہم نے ایک دوسرے سے شادی کی’۔

بولی وڈ کو خیرباد کہنے والی ثنا خان 20 نومبر کو مفتی انس سے شادی کے بندھن میں بندھی تھیں۔

انہوں نے انسٹا اکاؤنٹ پر جاری اسٹوریز میں بھی اپنی شادی کی مزید تصاویر جاری کیں۔

گزشتہ روز ان کی شادی کی ایک ویڈیو آن لائن وائرل ہوئی ہے جس میں مفتی انس اور ثنا خان کی شادی کی رسومات کو دکھایا گیا تھا۔

ویڈیو میں دولہا اور دلہن دونوں سفید رنگ کے عروسی ملبوسات زیب تن کیے ہوئے تھے۔

ویڈیو میں یہ بھی دیکھا جاسکتا ہے کہ نوبیاہتا جوڑا خاندان کے دیگر افراد کے ساتھ بیٹھا ہوا ایک کیک کاٹ رہا ہے جس پر نکاح مبارک لکھا ہے۔

تاہم ثنا خان کی جانب سے جاری کردہ تصاویر سوشل میڈیا پر زیر گردش تصاویر سے مختلف ہیں۔

خیال رہے کہ اکتوبر میں ثنا خان نے اپنے سوشل میڈیا اکاؤنٹس پر شوبز کو خیر باد کہنے سے متعلق اعلان کیا تھا۔

ثنا خان نے انسٹاگرام اور ٹوئٹر پر جاری پوسٹ میں شوبز چھوڑنے سے متعلق بیان انگریزی، اردو اور رومن میں جاری کیا تھا۔

اس کے ساتھ ہی اداکارہ نے پوسٹ کے کیپشن میں اس اعلان کو اپنی زندگی کا سب سے پرمسرت لمحہ قرار دیا تھا اور دعا کی تھی کہ اللہ تعالی اس سفر میں ان مدد اور رہنمائی کرے۔

ثنا خان نے اپنی پوسٹ میں لوگوں سے انہیں دعاؤں میں یاد رکھنے کی درخواست بھی کی تھی۔

بھارتی ادکارہ نے گزارش کی تھی آئندہ انہیں کبھی شوبز کے کسی کام کے لیے دعوت نہ دی جائے۔

ثنا خان نے اپنے سوشل میڈیا اکاؤنٹ سے اپنی شوٹ ڈائریز اور ٹرپز سے متعلق اپنی تصاویر اور ویڈیوز بھی ہٹادی تھیں۔

بھارتی اداکارہ ثنا خان نے بولی وڈ فلمز ہلہ بول، جے ہو، وجہ تم ہو اور ٹوائلٹ: ایک پریم کتھا میں کام کیا تھا۔

انہوں نے ریئلٹی ٹی وی شو ‘خطروں کے کھلاڑی’، کامیڈی نائٹس بچاؤ، انٹرٹینمنٹ رات، جھلک دکھلا جا 7 اور کچن چیمپئن’ میں بھی حصہ لیا تھا۔

اس کے علاوہ ثنا خان نے تامل اور تیلگو فلموں میں بھی کام کیا، سال 2007 میں انہوں نے بولی وڈ فلم دھن دھنا دھن گول میں آئٹم سانگ ’بلو رانی’ بھی کیا تھا۔

گزشتہ برس عامر خان کی سپرہٹ فلم ‘دنگل’ سے بولی وڈ میں مشہور ہونے والی اداکارہ زائرہ وسیم نے فلمی صنعت کو خیرباد کہنے کا فیصلہ کیا تھا۔

انسٹاگرام میں ایک پوسٹ میں زائرہ وسیم نے یہ اعلان کرتے ہوئے کہا تھا کہ ان کے کیرئیر کا انتخاب ان کے مذہبی عقائد پر اثر انداز ہورہا تھا۔