علی ظفر کی میشا شفیع کے سفری اخراجات برداشت کرنے کی پیشکش

پاکستان کے نامور ورسٹائل اداکار ، گلوکار اور ماڈل علی ظفر نے ہتک عزت کیس میں عدالت میں پیش نہ ہونے والی گلوکارہ میشا شفیع کو کینیڈا سے پاکستان آ کر عدالت میں پیش ہونے پر تمام سفری اخراجات برداشت کرنے کی پیشکش کر دی ہے۔

تفصیلات کے مطابق اس سلسلے میں علی ظفر کا کہنا ہے کہ میشا شفیع سفری اخراجات سے پریشان نہ ہو، میشا عدالت کے روبرو پیش ہو کرثبوت فراہم کریں۔

ذرائع کے مطابق لاہور کی سیشن کورٹ میں اداکارعلی ظفرکی جانب سے میشا شفیع کے خلاف ہتک عزت کے دعوے پر سماعت ہوئی۔

سماعت کے دوران میشا شفیع کے وکیل نے عدالت سے استدعا کرتے ہوئے کہا کہ موبائل ایپلی کیشن کے ذریعے میشا شفیع کا بیان مکمل کر لیا جائے۔

میشا شفیع کے وکیل کا عدالت سے استدعا کرتے ہوئے مزید کہنا تھا کہ میری موکلہ کو عدالت میں پیش ہونے کے لئے کینیڈا سے پاکستان آنا پڑے گا جس پر بہت خرچہ ہوگا۔

وکیل کے دلائل مکمل ہونے پر عدالت نے میشا شفیع اور دیگر گواہان کو 14 نومبر کو عدالت طلب کر لیا۔

واضح رہے کہ گلوکارہ میشا شفیع کی جانب سے گلوکار و اداکار علی ظفر پر جنسی ہراسانی کے الزامات لگائے گئے تھے، جس پر علی ظفر نے لاہور سیشن کورٹ میں میشا شفیع کے خلاف سو کروڑ روپے ہرجانے کا دعوی دائر کر رکھا ہے۔

علی ظفر نے درخواست میں موقف اپنایا ہے کہ ہراسانی کے بے بنیاد الزامات لگانے کی وجہ سے میری پوری دنیا میں شہرت متاثر ہوئی ہے۔