ویوو کا پہلا فولڈ ایبل اسمارٹ فون ایکس فولڈ

ویوو نے اپنا پہلا فولڈ ایبل اسمارٹ فون ایکس فولڈ متعارف کرا دیا، کمپنی کی جانب سے مذکورہ فون کو چند دن پہلے چین میں ایک ایونٹ کے دوران پیش کیا گیا تھا۔

ویوو ایکس فولڈ کا باہری ڈسپلے 6.53 انچ کا ہے جبکہ فولڈ ہونے پر ایل ٹی پی او 0 امولیڈ ای فائیو 8.03 انچ کا ڈسپلے سامنے آجاتا ہے۔

کمپنی کے مطابق فولڈنگ ڈسپلے کے لیے انتہائی پتلا گلاس استعمال کیا گیا ہے جبکہ 2 ان ڈسپلے فنگر اسکینر اسکرینز میں موجود ہیں۔

فون میں فلیگ شپ اسنیپ ڈراگون 8 جنریشن پراسیسر دیا گیا ہے جس کے ساتھ 12 جی بی ریم موجود ہے۔

ایکس فولڈ میں 4600 ایم اے ایچ بیٹری 66 واٹ فاسٹ چارجنگ سپورٹ کے ساتھ ہے اور ڈیوائس کو مکمل چارج ہونے کے لیے 37 منٹ درکار ہوتے ہیں۔

ایکس فولڈ میں 50 واٹ وائرلیس چارجنگ اور 10 واٹ ریورس وائرلیس چارجنگ سپورٹ بھی موجود ہے۔

فون کے کیمرے بھی فلیگ شپ گریڈ کے ہیں اور زئیسز برانڈ کے کیمرا موڈیول کو استعمال کیا گیا ہے۔

فون کا مین کیمرا 50 میگا پکسل کا ہے جس میں او آئی ایس فیچر موجود ہے، اس کے ساتھ 12 میگا پکسل زوم کیمرا، 48 میگا پکسل الٹرا وائیڈ اور ایک 5 ایکس پیری اسکوپ زوم کیمرا ڈیوائس کا حصہ ہے۔

اسی طرح ایکس فولڈ میں 2 سیلفی کیمرے بھی موجود ہیں جن میں سے ایک اندرونی اور ایک باہری اسکرین میں ہے۔

کمپنی کے مطابق بڑی اسکرین پر 2 ایپس کو بیک وقت چلایا جاسکتا ہے۔

اس فون کو فی الحال صرف چین میں فروخت کے لیے پیش کیا گیا ہے جس کی قیمت 8999 یوآن (2 لاکھ 56 ہزار پاکستانی روپے سے زائد) رکھی گئی ہے۔