لاہور:
پاکستان سپرلیگ فائیو کیلیے ٹکٹوں کی آن لائن فروخت کا پیر کی شب آغاز ہوگیا، افتتاحی میچ اور فائنل کے کئی انکلوژرز کی بیشتر ٹکٹیں چند منٹ میں ہی فروخت ہو گئیں، سستا ترین ٹکٹ 250 روپے اورمہنگا ترین 6 ہزار روپے کا ہے۔
نیشنل اسٹیڈیم کراچی میں 20 فروری کو افتتاحی تقریب سمیت کوئٹہ گلیڈی ایٹرز اور اسلام آباد یونائٹیڈ کے میچ کیلیے جنرل ٹکٹ کا نرخ ایک ہزار، فرسٹ کلاس 2500، پریمیئم 4ہزار اور وی آئی پی 6ہزار روپے رکھا گیا ہے، قذافی اسٹیڈیم لاہور میں 22 مارچ کو شیڈول فائنل کیلیے جنرل ٹکٹ 5 سو، فرسٹ کلاس15سو، پریمیئم 3ہزار اور وی آئی پی 5ہزار روپے میں دستیاب ہے۔
28جنوری جنوری سے ٹکٹیں 38شہروں پر نجی کوریئر کمپنی کے نامزد سینٹرز پر بھی دستیاب ہوں گی،ایک شناختی کارڈ پر زیادہ سے زیادہ 7ٹکٹ بک کرائے جا سکتے ہیں۔