تاپسی پنو پہلی مرتبہ بارشاہ رخ خان کے ساتھ رومانس کرنے کو تیار

بولی وڈ ’بادشاہ‘ شاہ رخ خان اگرچہ ان دنوں اپنی آنے والی میگا بجٹ فلم ’پٹھان‘ کی شوٹنگ میں مصروف ہیں لیکن ان کے شائقین کے لیے اچھی خبر ہے کہ وہ جلد ہی بڑی اسکرین پر خود سے 22 سال کم عمر ہیروئن کے ساتھ رومانس کرتے دکھائی دیں گے۔

جی ہاں، خبریں ہیں کہ 55 سالہ شاہ رخ خان پہلی بار بڑے پردے پر خود سے 22 سال کم عمر 33 سالہ ہیروئن تاپسی پنو کے ساتھ رومانس کرتے دکھائی دیں گے۔

بھارتی اخبار ’ٹائمز آف انڈیا‘ کے مطابق پہلی بار شاہ رخ خان اور تاپسی پنو شہرت یافتہ فلم ساز راج کمار ہیرانی کی سماجی مسئلے پر بنی فلم میں رومانس کرتے دکھائی دیں گے۔

تاپسی پنو ان دنوں اگرچہ کچھ فلموں کی شوٹنگ میں مصروف ہیں تاہم جلد ہی وہ شاہ رخ خان کے ساتھ راج کمار ہیرانی کی فلم کی شوٹنگ شروع کردیں گی۔

دونوں دیار غیر میں بسنے والے افراد کے ساتھ مسائل پر مبنی فلم میں رومانوی روپ میں دکھائی دیں گے۔

دونوں کی پہلی فلم کی کہانی ایک ایسے شخص کے گرد گھومتی ہے جو اچھے مستقبل کے لیے بھارت سے کینیڈا منتقل ہوتا ہے۔

فلم میں جہاں دیار غیر میں بسنے کی خواہش رکھنے والے افراد کو پیش آنے والے مسائل کو دکھایا جائے گا، وہیں فلم میں رومانس اور کامیڈی بھی ہوگی۔

ابھی یہ واضح نہیں ہے کہ تاپسی پنو اور شاہ رخ خان کی مذکورہ فلم کی کاسٹ میں اور کون سے اداکار شامل ہیں اور فلم کا نام کیا ہوگا؟

تاہم خیال کیا جا رہا ہے کہ آئندہ 2 ماہ کے دوران راج کمار ہیرانی کی فلم کی شوٹنگ شروع ہوجائے گی اور ممکنہ طور پر فلم کو آئندہ سال کے آغاز تک ریلیز کردیا جائے گا۔

فلم میں شاہ رخ خان اور تاپسی پنو کے علاوہ دیگر کاسٹ کا اعلان بھی آئندہ چند ماہ میں ہونے کا امکان ہے۔

اگرچہ مذکورہ فلم تاپسی پنو اور شاہ رخ خان کی بطور ہیرو اور ہیروئن پہلی فلم ہوگی تاہم دونوں اس سے قبل بھی ایک ساتھ کام کر چکے ہیں۔

تاپسی پنو اس سے قبل شاہ رخ خان کی پروڈیوس کردہ فلم ’بدلا‘ میں کام کر چکی ہیں تاہم اب پہلی بار دونوں رومانس کرتے دکھائی دیں گے۔

تاپسی پنو کو سماجی مسائل پر بنی فلموں ’پنک، بدلا، تھپڑ، سانڈ کی آنکھ، نام شبانہ، ملک اور دل جنگلی‘ جیسی فلموں کی وجہ سے کافی شہرت حاصل ہے۔

شاہ رخ خان بھی گزشتہ تین سال سے بڑی اسکرین پر جلوہ گر نہیں ہوئے، ان کی آخری فلم ’زیرو‘ 2018 میں ریلیز ہوئی تھی۔