سری دیوی نے بیٹی کو بالی وڈ میں کامیاب ہونے کی کیا نصیحت دی تھی؟

بالی وڈ کی اداکارہ جہانوی کپور نے والدہ کی جانب سے دی جانے والی نصیحتوں کے حوالے سے بتا دیا۔

اداکارہ جہانوی نے اپنی والدہ  سری دیوی کے حوالے سے گفتگو کرتے ہوئے کہا کہ والدہ کہتی تھیں کہ فلم انڈسٹری میں داخل ہونے پر لوگ تمہارا تقابل مجھ سے کریں گے اس لیے سخت محنت کرنے کی ضرورت ہے۔

انہوں نے کہا کہ اسی لیے وہ چاہتی ہیں کہ ان کا کیریئر کامیابی کی جانب گامزن ہو تاکہ وہ سری دیوی کے لیے قابلِ فخر بن سکیں۔

جہانوی نے والدہ کا ذکر کرتے ہوئے بتایا کہ والدہ کہتی تھیں کہ بالی ووڈ کوئی آسان جگہ نہیں اور تم بہت سادہ اور نرم دل ہو۔

اداکارہ نے بتایا کہ میری والدہ نے کہا کہ لوگ تمہاری پہلی فلم کا میری 300 فلموں سے تقابل کریں گے، تم اسکا کس طرح سامنا کروگی؟

تاہم جہانوی کا کہنا تھا کہ مجھے کچھ اور تو پتہ نہیں لیکن میں چاہتی ہوں کہ کیریئر کامیاب ہو، نام تو روشن کرنا پڑیگا تاکہ انہیں فخر ہو۔

واضح رہے کہ بالی ووڈ کی سینئر اداکارہ سری دیوی 24 فروری 2018 کو دبئی میں چل بسی تھیں۔

سن 1983 میں فلم ہمت والا سے بطور اسٹار اداکارہ اپنے بالی ووڈ کیریئر کا آغاز کرنے والی سری دیوی نے 1996 میں بونی کپور سے شادی کی جن سے ان کی دو بیٹیاں جہانوی اور خوشی پیدا ہوئیں۔