گزشتہ روز مسجد الحرام میں کتنے افراد نے نماز جمعہ ادا کی؟

رمضان المبارک کے دوسرے جمعہ مسجد حرام میں نمازیوں کی تعداد میں بڑا اضافہ دیکھنے میں آیا جہاں تقریباً 15 لاکھ افراد نے نماز  جمعہ ادا کی جس کی تصویر بھی سوشل میڈیا پر شیئر کی گئی ہے۔

رحمت و برکت والے مہینے میں پوری دنیا سے لاکھوں زائرین عمرے کی ادائیگی کے لیے مکہ مکرمہ پہنچتے ہیں جہاں لوگ پُرسکون ماحول میں اپنی عبادت کی ادائیگی کرتے ہیں۔

العربیہ نیوز کے مطابق مسجد حرام میں گزشتہ روز رمضان المبارک کے دوسرے جمعے کو لگ بھگ ڈیڑھ ملین زائرین نے خانہ کعبہ کے سامنے نماز ادا کی۔

سوشل میڈیا پر جاری تصاویر میں دیکھا جاسکتا ہے کہ المسجد الحرام کی راہداری اور فرش، اس کے تہہ خانے، چھتیں اور صحن نمازیوں سے بھرے ہوئے تھے۔ نمازیوں کی صفیں مسجد کے اطراف کی سڑکوں، چوکوں اور محلوں تک پھیلی ہوئی تھیں۔

رپورٹ کے مطابق صدارت عامہ برائے امور مسجد حرام و مسجد نبوی کی جانب ست حرم کی راہداریوں، ہالز اور صحنوں میں انتظامیہ نے بہترین خدمات کانظام قائم کر رکھا تھا جس کے  بدولت لاکھوں نمازیوں کے ہجوم کو کہیں بھی رکاوٹ کا سامنا نہیں کرنا پڑا ۔

صدارت عامہ کے صدر ڈاکٹر عبدالرحمن السدیس نے ماہ مبارک کے دوسرے جمعہ کے لیے آپریشنل منصوبے کی کامیابی سے آگاہ کیا اور بتایا کہ جمعہ کو فجر سے ہی بڑی تعداد میں لوگ مسجد حرام میں پہنچ گئے تھے۔

انتظامیہ نے یہ بھی بتایا کہ بیت اللہ شریف کی مسجد میں بہترین صفائی اور ستھرائی کا بھی انتظام کیا گیا ہے، ماحول کو جراثیم سے پاک کرنے کے لیے اقدامات کیے گئے ہیں۔