ایلون مسک کی فلسطینیوں کے حق میں پوسٹ کرنے والوں کو دھمکی

دنیا کے امیرترین شخص اور ایکس کے مالک ایلون مسک نے فلسطینیوں کے حق میں پوسٹ کرنے والوں کا اکاؤنٹ معطل کرنے کی دھمکی دے دی۔

اسرائیلی بربریت اور  فلسطینی نسل کشی پر شدید الفاظ میں مذمت کرنے والے ایلون مسک نے ایکس پر فلسطینیوں کے حق میں دو جملے لکھنے پر پابندی عائد کردی ہے۔

گزشتہ دنوں ہی بزنس ٹائیکون ایلون مسک نے سیٹلائٹ کے ذریعے انٹرنیٹ فراہم کرنے والی اپنی کمپنی اسٹارلنک کے ذریعے غزہ میں انٹرنیٹ فراہم کرنےکا اعلان کیا تھا اس کے بعد ایکس پر ہی انہوں نے اسرائیلی بربریت اور  فلسطینی نسل کشی پر شدید الفاظ میں مذمت کرتے  ہوئے کہا تھا کہ نسل کشی کرنا کسی کے لیے بھی  قابلِ قبول عمل نہیں ہے۔۔

تاہم اب ایلون مسک نے ایکس (ٹوئٹر) پر جاری کردہ بیان میں کہا کہ جو کوئی بھی ایکس پر فلسطینوں کا مقبول نعرہ ’’ دریا سے سمندر تک‘‘ یا ’’ نوآبادیات کا خاتمہ‘‘ لکھے گا اس کا اکاؤنٹ معطل کردیا جائے گا۔

ایلون مسک نے دعویٰ کیا کہ ان دونوں جملوں کا اشارہ یہودیوں کی نسل کشی کی جانب ہے اس لیے کسی کو انہیں استعمال کرنے کی اجازت نہیں دی جا سکتی۔ اس طرح کے جملوں کے استعمال کے نتیجے میں ایکس اکاؤنٹ کو معطل کردیا جائے گا۔

یاد رہے کہ ’من النہر فی البحر‘ کا نعرہ فلسطینی اپنی آزادی کے لیے بلند کرتے ہیں جس کا مطلب دریائے اردن کے کنارے سے لے کر بحیرہ روم تک ہے۔ تاہم ان دو مقامات کے بیچ میں اسرائیلی علاقے ہیں اور اسرائیل کے حامیوں کا کہنا ہے کہ اس نعرے کا مطلب اسرائیل کا خاتمہ ہے۔

ایلون مسک کے فیصلے پر ہیومن رائٹس واچ کے ڈائریکٹر عمر شاکر شدید تنقید کی ہے، انہوں نے سوشل میڈیا پر لکھا کہ پرامن اور جائز تقریر پر صارفین کو خاموش کرنے کی دھمکی دینا ایلون مسک کی نچلی سطح ہے۔