’حوثیوں نے اسرائیل کا بحری جہاز اغوا کرلیا‘

صنعا: یمن کے حوثی جنگجوؤں کا کہنا ہے کہ اگر غزہ پر مظالم کا سلسلہ نہ روکا گیا تو سمندروں سے گزرنے والے اسرائیل کے بحری جہازوں کو ہائی جیک کرلیں گے۔

بین الاقوامی خبر رساں ادارے کی رپورٹ میں بتایا گیا ہے کہ حوثی باغیوں کی جانب سے یہ بیان ایسے وقت میں دیا گیا ہے کہ جب بحیرہ احمر میں سفر کرنے والے اسرائیل کے ایک مال بردار بحری جہاز کو اغوا کر لیا گیا جس میں عملے کے 25 ارکان موجود تھے۔

حوثی جنگجوؤں کے ترجمان محمد عبدالسلام کے جاری کردہ بیان میں کہا گیا ہے کہ اسرائیل صرف “طاقت کی زبان” سمجھتا ہے۔ اس لیے اسرائیلی جہاز کو اغوا کرکے اس میں موجود 25 افراد کو یرغمال بنالیا گیا ہے اور اگر غزہ پر بمباری کا سلسلہ نہ روکا گیا تو اسرائیلی بحری جہازوں کو نشانہ بنایا جائے گا۔

اغوا ہونے والے جہاز کے جاپانی آپریٹر کے مطابق عملے کے ارکان کا تعلق فلپائن، بلغاریہ، رومانیہ، یوکرین اور میکسیکو سے ہے اور ہائی جیک ہونے کے وقت جہاز میں کوئی سامان موجود نہیں تھا۔

جہاز اغوا ہونے کی مذمت کرتے ہوئے جاپان کے چیف کیبنٹ سیکرٹری ہیروکازو ماتسونو کا کہنا تھا کہ عملے کی بحفاظت رہائی کے لیے حوثی باغیوں کے ساتھ مذاکرات کا سلسلہ جاری ہے، سعودی عرب، عمان اور ایران کی حکومتیں تعاون کر رہی ہیں۔

واضح رہے کہ اسرائیل کی جانب سے کہا جارہا ہے کہ اغوا ہونے والا بحری جہاز برطانوی ملکیت ہے جسے جاپانی آپریٹر چلاتے ہیں تاہم عوامی شپنگ ڈیٹا بیس میں جہاز کی ملکیت اسرائیل کے امیر ترین تاجر کی ہے۔

اسرائیلی وزیراعظم کا کہنا ہے کہ جہاز پر عملے کے 25 ارکان سوار تھے جن میں بلغاریائی، فلپائنی، میکسیکن اور یوکرینی باشندے شامل تھے، مگر اس میں کوئی اسرائیلی شہری سوار نہیں تھا۔