عامر خان کے ساتھ فلم کرنے والی معروف اداکارہ چل بسیں

بالی ووڈ فلم انڈسٹری کے مسٹر پرفیکشنسٹ عامر خان کی سُپر ہٹ فلم ‘دنگل’ میں اُن کی بیٹی ببیتا کماری کے بچپن کا کردار ادا کرنے والی اداکارہ سوہانی بھٹناگر انتقال کرگئیں۔

بھارتی میڈیا رپورٹس کے مطابق کچھ عرصہ قبل سوہانی بھٹناگر کی ٹانگ میں فریکچر ہوا تھا جس کے علاج کے لیے اُنہوں نے دوائیاں لی تھیں، لیکن ان دوائیوں نے اداکارہ کی صحت پر منفی اثر ڈالا جس کے بعد اُن کے پورے جسم میں پانی بھر گیا تھا۔

ان کو تشویشناک حالت میں دہلی کے اسپتال میں داخل کیا گیا جہاں اداکارہ کا علاج جاری تھا لیکن اُن کی طبیعت سنبھل نہ سکی اور وہ اس دنیا سے رخصت ہوگئیں۔

خیال رہے کہ فلم دنگل 23 دسمبر 2016 کو ریلیز کی گئی تھی، ریلیز کے فوراً بعد یہ سب سے زیادہ کمائی کرنے والی بالی ووڈ فلم بن گئی تھی۔

فاطمہ ثنا شیخ اور سانیا ملہوترا نے عامر خان کی بیٹیوں کے بالغ کردار جبکہ زائرہ وسیم اور سوہانی بھٹناگر نے ان کے چھوٹے کردار ادا کیے تھے۔