ورلڈ کپ سے قبل فٹنس ٹیسٹ کیلئے 23 کھلاڑیوں کے ناموں کا اعلان

پاکستان کپ ون ڈے کرکٹ ٹورنامنٹ میں کھلاڑیوں کی کارکردگی کو سلیکٹرز اہمیت نہیں دے رہے اور ٹورنامنٹ کے تیسرے روز ہی سلیکٹرز نے فٹنس کیمپ کے لیے ممکنہ کھلاڑیوں کی فہرست کا اعلان کر دیا۔

 مڈل آرڈر بیٹسمین عمر اکمل ورلڈ کپ کی فلائٹ مس کر چکے ہیں۔ سلیکٹرز نے ان کی سلیکشن پر غور نہ کرنے کافیصلہ کیا ہے۔

قومی سلیکشن کمیٹی نے ہیڈ کوچ مکی آرتھر کی مشاورت کے بعد پاکستانی ٹیم کے فٹنس ٹیسٹ کے لیے محمد حفیظ سمیت 23 کھلاڑیوں کے ناموں کا اعلان کیا ہے۔

پی سی بی کا کہنا ہے کہ انگلینڈ میں ہونے والے ورلڈ کپ کے لیے 15 رکنی پاکستانی ٹیم کا اعلان 18اپریل کو کیا جائے گا جب کہ پاکستانی ٹیم 23 اپریل کو روانہ ہو گی۔ چیف سلیکٹر انضمام الحق میڈیا کانفرنس میں ٹیم کا اعلان کریں گے۔

 عمر اکمل نے پاکستان کپ کے پہلے میچ میں 136 رنز ناٹ آوٹ اور دوسرے میچ میں99 رنز بنائے۔ اچھی کارکردگی کے باوجود دبئی کے آخری ون ڈے سے قبل عمر اکمل نے ڈسپلن کی سنگین خلاف ورزی کی۔

ٹیم مینیجر کی طرف سے رپورٹ منیجنگ ڈائریکٹر وسیم خان کو دی گئی جس کے بعد عمر اکمل کوڈسپلن توڑنے پر میچ فیس کے 20 فیصد حصے سے بھی محروم ہونا پڑا اور ساتھ میں وارننگ بھی دی گئی۔

فٹنس ٹیسٹ 15، 16 اپریل کو قومی اکیڈمی لاہور میں ہوں گے۔ فٹنس ٹیسٹ کے لیے منتخب کردہ کھلاڑیوں میں سرفراز احمد (کپتان)، فخر زمان، امام الحق، عابد علی، بابر اعظم، محمد حفیظ، شعیب ملک، حارث سہیل، آصف علی، شان مسعود، فہیم اشرف، عماد وسیم، محمد رضوان، حسن علی، جنید خان، محمد عباس، محمد عامر، محمد حسنین، محمد نواز، شاداب خان، شاہین شاہ آفریدی، عثمان خان شنواری اور یاسر شاہ شامل ہیں۔