میرا کی فلم ‘باجی’ ایک اور اعزاز حاصل کرنے میں کامیاب

پاکستان کی نامور اداکارہ میرا کی فلم ‘باجی’ کو پاکستان سمیت دنیا بھر میں شائقین کا مثبت ردعمل موصول ہوا اور اب یہ فلم ایک اور اعزاز اپنے نام کرانے میں کامیاب ہوگئی۔

فلم ‘باجی’ رواں سال منعقد ہونے والے برطانوی ایشین فلم فیسٹیول میں 28، 29 اور یکم اپریل کو نمائش کے لیے پیش کی جائے گی۔

واضح رہے کہ اس فیسٹیول کا آغاز 25 مارچ سے ہورہا ہے جو 15 اپریل تک جاری رہے گا۔

مزید پڑھیں: میرا کی ‘باجی’ اب وینکور جانے کو تیار

یاد رہے کہ فلم ‘باجی’ کی کاسٹ میں اداکارہ میرا کے ساتھ ساتھ آمنہ الیاس، عثمان خالد بٹ، علی کاظمی، نیئر اعجاز نے اہم کردار نبھائے۔

اس فلم کی کہانی لولی وڈ کی ایک سینئر اداکارہ کی زندگی پر مبنی ہے جس کا کردار میرا نے نبھایا۔

فلم میں بتایا گیا کہ میرا کے کردار شمیرا کو بڑھتی عمر کے باعث فلموں میں کردار ملنے پر مشکلات کا سامنا ہونا شروع ہوا، اس کے باوجود انہوں نے اپنے کیریئر کو آگے لے جانے کا ارادہ برقرار رکھا، بعدازاں بیوٹی پارلر میں کام کرنے والی ایک لڑکی نیہا (آمنہ الیاس) انہیں پسند آتی ہے جسے وہ اپنا منیجر بنا لیتی ہیں۔

یہ بھی پڑھیں: میرا کی فلم ‘باجی’ نے کینیڈا میں دو ایوارڈز جیت لیے

نیہا اپنا کام اس بہترین انداز سے نبھاتی ہے اور شمیرا کو واپس اسکرینز پر جگہ ملنے لگتی ہے، تاہم شمیرا اپنی جگہ کھونے کے ڈر سے احساس کمتری کا شکار ہونے لگتی ہیں اور نیہا کو اس کا ذمہ دار ٹھہراتی ہے۔

واضح رہے کہ برطانوی ایشین فلم فیسٹیول سے قبل فلم وینکور انٹرنیشنل ساؤتھ ایشین فلم فیسٹیول میں بھی نمائش کے لیے پیش کی جاچکی ہے جبکہ موسیک انٹرنیشنل ساؤتھ ایشین فلم فیسٹیول میں اسے دو ایوارڈز بھی ملے تھے۔