بنگلادیش: ڈھاکا کی مارکیٹ میں آتشزدگی، سیکڑوں دکانیں جل کر خاکستر

بنگلادیش کے دارالحکومت ڈھاکا کی مارکیٹ میں آگ لگنے سے سیکڑوں دکانیں جل کر خاک ہوگئیں۔

غیرملکی میڈیا کے مطابق آج  منگل کی علی الصبح بونگو بازار اور اس سے ملحقہ 3 تجارتی علاقے میں 3000 کپڑوں کی دوکان کو  آگ نے اپنی لپیٹ میں لے کر خاک کردیا ہے، تقریباً 600 فائر فائٹرز آگ پر قابو پانے کی کوششوں میں لگے ہوئے ہیں۔

بنگلادیشی فوج کے ترجمان کا کہنا ہے کہ فضائیہ کا 1 ہیلی کاپٹر بھی آگ بجھانے کی کوشش میں شامل ہے تاہم فوری طور پر کسی جانی نقصان کی کوئی اطلاع نہیں ہے۔

ہیلی کاپٹر سے ملنے والی فضائی فوٹیج میں سینکڑوں افراد کو قریبی اوور پاس سے آگ دیکھتے ہوئے دکھایا گیا ہے۔

مارکیٹ کے دکانداروں کا کہنا ہے کہ ہزاروں کی تعداد میں دکانیں جل گئیں اور ہمارا سب کچھ تباہ ہوگیا، پریشان دکانوں کے مالکان نے صحافیوں کو بتایا کہ عید سے چند ہفتے قبل آگ نے ہمیں بے سہارا کر دیا۔

ایک دوکان کے مالک اختر حسین نے کہا کہ میں نے عید سے پہلے دوکان میں مال اسٹوک کرنے کے لیے تقریباً ایک ملین ٹکے کی سرمایہ کاری کی تھی لیکن اب وہ سب راکھ میں بدل گیا میں اس خسارے سے کیسے نکلوں گا۔

رپورٹ میں بتایا گیا کہ مارکیٹ میں کروڑوں مالیت کے ریڈی میڈ ملبوسات موجود تھے، زیادہ تر دکانوں میں عید کی وجہ سے اضافی اسٹاک تھا۔