میچ بچانے کیلئے گلبدین نائب کی چالاکیاں سوشل میڈیا پر مذاق بن گئیں

افغان کرکٹر گلبدین نائب اچھے آل راؤنڈر تو ہیں ہی کیا وہ بہترین ایکٹر بھی ہیں؟ یہ سوال اس وقت زیر گردش آیا جب گلبدین نیب اپنی ٹیم کےلیے میچ بچانے کی خاطر زمین پر گر پڑے۔ 

افغانستان اور بنگلادیش کے گروپ 1 کے انتہائی اہم میچ کے اختتامی لمحات میں بار بار بارش آڑے آرہی تھی، کبھی ڈک ورتھ لوئس پر افغانستان تو کبھی بنگلادیش آگے رہی۔

تاہم 12ویں اوور میں بارش کے وقت جب افغان ٹیم ڈک ورتھ لوئس پر آگے تھی تو افغان کوچ جوناتھن ٹراٹ نے میچ روکنے یا سلو کرنے کا اشارہ کیا۔

عین اسی وقت سلپ میں کھڑے گلبدین نائب ہیمسٹرنگ کا بہانہ کرکے زمین پر ایسے گرے جیسے انکا اٹھنا مشکل ہوگیا ہو۔

ایسے میں کمنٹیٹر نے قہقہ لگاتے ہوئے گلبدین کی بہترین اداکاری پر کہا کہ انہیں آسکر دیا جائے یا ایمی۔

یہاں دلچسپ بات یہ ہے کہ کچھ دیر بعد گلبدین بولنگ کےلیے آئے اور وکٹ بھی حاصل کی۔ یہی نہیں بلکہ اپنی ٹیم کی کامیابی کے بعد ٹیم کے ساتھ بجلی کی تیزی سے دوڑتے ہوئے بھی نظر آئے۔

گلبدین نائب کی اس حرکت نے کرکٹ کے متوالوں کو مایوس کیا، انہوں نے گلبدین کی جانب سے میچ میں زبردستی تاخیر کی کوشش کو اسپرٹ آف دا گیم کے منافی قرار دیا۔

دوسری جانب سوشل میڈیا پر گلبدین نائب خود ایک مذاق بن گئے۔ ایک صارف نے مشہور زمانہ فلم ویلکم کے کردار “بلو” کی ویڈیو شیئر۔

ایک صارف نے تمسخر اڑاتے ہوئے کہا کہ جیت کے بعد سب سے تیز گلبدین نائب ہی بھاگے ہیں۔ ایک صارف نے یوں لکھا کہ 10 بجکر 1 منٹ پر گلبدین کو کریمپس پڑے لیکن 10 بجکر 34 منٹ پر وہ ٹیم میں سب سے تیز دوڑ رہے تھے۔

یہی نہیں بلکہ بھارتی کرکٹر روی چندرن ایشون نے بھی چٹکلہ چھوڑ دیا کہ گلبدین کو ریڈ کارڈ ملنا چاہیے اس پر گلبدین نے جواب دیا کہ “کبھی خوشی کبھی غم میں ہوتا ہے ہیمسٹرنگ”۔