کوروناویکسین کی کروڑویں خوراک، سعودی حاملہ خاتون دوسروں کیلئے مثال بن گئیں

ریاض: سعودی عرب میں مجموعی طور پر ایک کروڑ افراد کو کوروناویکسین لگائی جاچکی ہے جن میں منیرہ نامی وہ حاملہ خاتون ہیں جنہوں نے ویکسین کی کروڑویں خوراک لی۔

غیرملکی خبررساں ادارے کی رپورٹ کے مطابق منیرہ نے کوروناویکسین لگوانے کے بعد اپنے خصوصی پیغام میں دیگر خواتین کو بھی حوصلہ دلایا اور کہا میں حاملہ ہوں لیکن ویکسینیشن میں کسی قسم کی پریشانی پیش نہیں آئی، آپ بھی پہلی فرصت میں بکنگ کرا کر ویکسین لگوائیں۔

ان کا کہنا تھا کہ ‘ماں بننے والی ہوں’ کی خوش میں پہلی فرصت میں ویکسین لگوائی، کورونا وبا کے دوران دیگر حاملہ خواتین کے لیے بھی ویکسینیشن بہت ضروری ہے تاکہ وہ مہلک وبا سے محفوظ رہیں۔

ویکسین کی کروڑویں خوراک لینے والی خاتون کا ویڈیو پیغام سعودی وزارت صحت کے سماجی رابطے کی ویب سائٹ ٹوئٹر پر موجود ہے۔ منیرہ کو ویکسین کی کروڑویں خوراک لینے والا کارڈ بھی جاری کردیا گیا۔