یروشلیم: اسرائیلی حکومت مقبوضہ مغربی کنارے یا غزہ کے ان فلسطینیوں کو شہریت یا رہائش دینے سے متعلق متنازع قانون کی تجدید میں ناکام ہوگئی جنہوں نے اسرائیلی شہریوں سے شادی کی ہے۔
پارلیمنٹ میں متنازع قانون کی تجدید میں ناکامی سے نئی اتحادی حکومت کو دھچکا ہے۔
غیر ملکی خبر رساں ادارے ‘رائٹرز’ کی رپورٹ کے مطابق اسرائیلی پارلیمنٹ (کنیسٹ) میں قانون کی تجدید کے حق اور مخالفت میں 59، 59 ووٹ ڈالے گئے، اس طرح 2003 کے قانون کی تجدید کے لیے سادہ اکثریت حاصل نہ ہو سکی جس کی مدت رات کو مکمل ہوگئی۔
وزیر اعظم نفتالی بینیٹ نے کہا کہ ووٹ سوچے سمجھے منصوبے کے تحت قومی سلامتی کو دھچکا لگانے کے لیے ڈالے گئے۔
اس ووٹنگ سے وزیر اعظم نفتالی بینیٹ کی حکومت کو درپیش چلینجز کی جھلک سامنے آئی ہے۔