کپتانی کا موقع ملا تو ضرور قبول کروں گا: سعود شکیل

کوئٹہ گلیڈی ایٹرز کے نائب کپتان سعود شکیل نے کہا ہے کہ کپتان بننا فخر کی بات ہوتی ہے، ایسا نہیں کہ چاہتا ہوں کپتان بنوں لیکن موقع ملے تو ضرور قبول کروں گا۔

جیو نیوز سے گفتگو کرتے ہوئے سعود شکیل نے کہا کہ کپتان چیلنج سمجھ کر ضرور بنوں گا، سیکھنے کا موقع ملتا ہے، میں نے کپتانی کو ہمیشہ انجوائے کیا ہے، انڈر 19 کا کپتان بنا تو ڈریسنگ روم کا ماحول اچھا رکھا اور اچھی کپتانی کی۔

نائب کپتان سعود شکیل کا کہنا ہے کہ کوئٹہ گلیڈی ایٹرز کے لیے اچھی شروعات ہوئی ہے، انفرادی کارکردگی اچھی رہی ہے، اوپننگ کا نیا رول ملا ہے، کوئٹہ گلیڈی ایٹرز نے دو دن قبل پی ایس ایل شروع ہونے سے اوپننگ کا کہا۔

انہوں نے کہا کہ تین نمبر پر فرسٹ کلاس کھیلی، پانچ نمبر پر پاکستان کے لیے کھیلا، پہلے بہت سوچتا تھا کہ تین نمبر پر ہی کھیلنا ہے، اب جہاں موقع ملتا ہے چیلنج سمجھ کر کھیلتا ہوں، گراؤنڈ پر شاٹس مارنا پسند کرتا ہوں لیکن اپنا گیم ٹی ٹوئنٹی کے حساب سے تبدیل کیا ہے۔

سعود شکیل کا کہنا ہے کہ پاکستان  اور بھارت میں پچز کا اتنا فرق نہیں، بھارت کے گراؤنڈ پاکستان سے چھوٹے ہیں، پاکستان کی نسبت بھارت میں گیند اسپن زیادہ ہوتی ہے۔

کوئٹہ گلیڈی ایٹرز کے نائب کپتان نے کہا کہ خواہش ہے جو بھی پاکستان کے لیے میچ کھیلوں ہم جیتیں، جنوبی افریقا ٹیسٹ سیریز کھیلنے جائیں تو جیتنے کی خواہش ہے، چاہتا ہوں جو بھی اننگز کھیلوں اس سے پاکستان کو فائدہ پہنچے۔