برطانیہ: مسجد سے گھر آنیوالے پاکستانی نژاد بچے پر قاتلانہ حملہ

برطانیہ میں مسجد سے گھر آنیوالے پاکستانی نژاد کمسن بچے کو نا معلوم افراد کی جانب سے بد ترین تشدد کا نشانہ بنایا گیا۔

بین الاقوامی خبر رساں ادارے کی رپورٹ کے مطابق افسوسناک واقعہ اسکاٹ لینڈ میں گلاسگو کا کوئنز پارک کے قریب رونما ہوا، جہاں 13 سالہ پاکستانی نژاد کمسن بچہ مسجد میں نماز پڑھ کر گھر واپس جارہا تھا کہ حملہ آوروں نے چاقو سے حملہ کرکے اسے شدید زخمی کردیا۔

برطانوی پولیس کا اس حوالے سے کہنا ہے کہ واقعے کی اطلاع ملتے ہی بچے کو شدید زخمی حالت میں اسپتال پہنچادیا گیا ہے، جہاں اس کا ٹریٹمنٹ جاری ہے، جبکہ بچے کی حالت خطرے سے باہر بتائی جارہی ہے۔

متاثرہ خاندان کا کہنا ہے کہ کمسن بچے کی کمر پر زخم آئے ہیں، زخم گہرے ہونے کے باعث اس کا پھیپھڑا بھی شدید متاثر ہوا ہے۔

پولیس کا کہنا ہے کہ سی سی ٹی فوٹیج کی مدد سے حملہ آوروں کو حراست میں لے کر عدالت کے روبرو پیش کردیا گیا ہے، جبکہ مزید تحقیقات کا سلسلہ جاری ہے۔