کرونا وائرس؛ پاکستان کسٹمز نے چین سے کنسائمنٹس کی کلیئرنس روک دی

کراچی: 

پاکستان کسٹمز نے کرونا وائرس کے خطرات کے پیش نظر چین سے سمندری راستوں کے ذریعے درآمد ہونے والے کنسائمنٹس کی فیومیگیشن کے بغیر کلئیرنس بدھ سے روک دی ہے۔

چیف کلکٹرکسٹمز واصف علی میمن نے ایکسپریس کوبتایاکہ بندرگاہوں پر چین سے درآمد ہونے والے کنسائمنٹس کی نگرانی اور جانچ پڑتال بھی سخت کردی گئی۔ واضع رہے وزارت بندرگاہ جہاز رانی اور پورٹ ہیلتھ اسٹیبلشمنٹ کی جانب سے محکمہ کسٹمز اور پورٹ اتھارٹیز کو الرٹ جاری کیے گئے ہیں جس کے تحت چین سے درآمدہونے والے کنسائمنٹس کی کلئیرنس کوفیومیگیشن سے مشروط کردی گئی ہے۔

وفاقی ادارےپورٹ ہیلتھ اسٹبلشمنٹ نے محکمہ کسٹمزکو ہدایت کی ہے کہ وہ گذشتہ16دنوں میں چین سے درآمد ہونے والے پرندوں اور مویشیوں کے فیومیگیشن کے بغیرکنسائمنٹس کی کلیئرنس میں احتیاط کرے۔ کرونا وائرس نے چین میں انسانی زندگیوں کوخطرناک حدتک متاثرکیاہےجہاں 100سے زائداموات ہوئی ہیں۔چین سے درآمدہ کنسائمنٹس کی کلیئرنس روکنے کا مقصدپاکستانیوں کوکرونا وائرس سےبچاناہے۔

ہدایات میں کہاگیا ہے کہ بحری جہازوں کے عملے کو جہاز کے اندر ہی محدود رکھاجائے کیونکہ شور لیف پاس جاری ہونے سے بحری جہاز کے عملے کو شہرمیں جانے کی اجازت ہوتی ہے۔ یہ احکامات کے پی ٹی،پورٹ قاسم اور گوادر پورٹ کے سربراہوں کو جاری کیے گئے ہیں۔