Jago Times "Urdu Edition" Best Online Newspaper
حکومت سندھ کے ترجمان مرتضیٰ وہاب نے قومی ادارہ برائے امراض قلب (این آئی سی وی ڈی) پر نیب کے چھاپے پر احتجاج کرتے ہوئے کہا ہے کہ این آئی سی وی ڈی کے خلاف انکوائری پر نہیں چھاپے پر اعتراض ہے۔
انہوں نے کہا کہ قومی احتساب بیورو (نیب) نے این آئی سی وی ڈی پرنظریں جمائی ہوئی ہیں، نیب ان لوگوں کےخلاف کارروائی کیوں نہیں کرتا جنہوں نےچینی اسکینڈل میں ملک کواربوں کا ٹیکہ لگایا۔
مرتضیٰ وہاب نے مزید کہا کہ انسپکٹر جنرل (آئی جی) سندھ کے معاملے پر دو چار دن میں آرمی چیف کی انکوائری کمیٹی کی رپورٹ آجائےگی۔
ترجمان سندھ حکومت مرتضیٰ وہاب نے پریس کانفرنس میں قومی ادارہ برائے امراض قلب پر نیب کارروائی کی مذمت کی اور کہا کہ پانچ سال کے دوران ادارہ امراض قلب میں 74 لاکھ 65 ہزار مریضوں کا مفت علاج ہوچکا ہے ان میں دیگر صوبوں کے مریض بھی شامل ہیں جبکہ این آئی سی وی ڈی کو صوبے بھر میں وسعت دی ہے
ترجمان سندھ حکومت مرتضیٰ وہاب نے قومی ادارہ برائے امراض قلب کے سربراہ کی تعیناتی کو قانونی قرار دیتے ہوئے کہا کہ وزیراعظم کے مشیروں پر تو کوئی بات نہیں کرتا پھر اسپتال کے سربراہ پر انگلی کیوں اٹھائی جا رہی ہے؟
مرتضیٰ وہاب نے گلگت بلتستان میں اعلانات اور وفاقی وزراء کے دوروں کو دھاندلی قبل از انتخابات قرار دیتے ہوئے الیکشن کمیشن سے نوٹس لینے کامطالبہ کیا ہے۔