نیوزی لینڈ کے سیکیورٹی وفد کی چیئرمین پی سی بی سے ملاقات

نیوزی لینڈ کے سیکیورٹی وفد نے پاکستان کرکٹ بورڈ کے چیئرمین محسن نقوی سے ملاقات کی ہے۔

سیکیورٹی وفد میں نیوزی لینڈ پلیئرز ایسوسی ایشن کے چیف ایگزیکٹو آفیسر ہیتھ ملز (Heath Mills) اور سیکیورٹی کنسلٹنٹ ریگ ڈکاسن (Reg Dickason) شامل تھے۔

ملاقات میں نیوزی لینڈ کرکٹ ٹیم کے دورۂ پاکستان کے انتظامات اور سیکیورٹی پلان پر تبادلہ خیال کیا گیا۔

چیئرمین پی سی بی محسن نقوی نے کیوی وفد کو فول پروف سیکیورٹی انتظامات کی یقین دہانی کرائی اور کہا کہ نیوزی لینڈ کرکٹ ٹیم کے کھلاڑی پاکستان کے مہمان ہیں۔

محسن نقوی نے کہا کہ کیوی ٹیم کے لیے بہترین سیکیورٹی انتظامات کیے جائیں گے۔

اس موقع پر کیوی وفد کا کہنا تھا کہ راولپنڈی کرکٹ اسٹیڈیم کا دورہ کیا، وہاں سیکیورٹی انتظامات شاندار ہیں۔

کیوی وفد نے سیکیورٹی پلان پر اطمینان کا اظہار کیا جبکہ انہیں پاکستان کرکٹ بورڈ کی جانب سے کیے گئے سیکیورٹی اقدامات سے بھی آگاہ کیا گیا۔

پی سی بی کے چیف آپریٹنگ آفیسر سلمان نصیر، ڈائریکٹر سیکیورٹی ڈیپارٹمنٹ کرنل خالد اور ڈائریکٹر انٹرنیشنل پاکستان کرکٹ بورڈ عثمان واہلہ بھی اس موقع پر موجود تھے۔

واضح رہے کہ نیوزی لینڈ کرکٹ ٹیم کا دورۂ پاکستان اپریل میں شیڈول ہے، جس میں دونوں ٹیموں کے درمیان 5 ٹی ٹوئنٹی میچز کھیلے جائیں گے۔