اداکارہ ماہم عامر اور فیضان شیخ کے ہاں پہلے بچے کی پیدائش

اداکار و میزبان فیضان شیخ اور اداکارہ ماہم عامر کے ہاں شادی کے تین سال بعد پہلے بچے کی پیدائش ہوگئی۔

دونوں اداکاروں نے بچے کی پیدائش کی تصدیق سوشل میڈیا پوسٹس کے ذریعے کی اور مداحوں سے زچہ و بچہ کے لیے دعا کی اپیل بھی کی۔

اداکار فیضان شیخ نے انسٹاگرام پوسٹ میں 28 اور 29 دسمبر کی درمیانی شب بتایا کہ ان کے ہاں پہلی بیٹی کی پیدائش ہوئی ہے، تاہم انہوں نے بیٹی کا نام نہیں بتایا

میزبان نے لکھا کہ وہ ہسپتال میں دو فرد ہی آئے تھے مگر اب خدا کے فضل و کرم سے وہ تین بن چکے ہیں، ساتھ ہی انہوں نے مداحوں سے اہلیہ و بچی کی صحت یابی کے لیے دعا کی اپیل بھی کی۔

ان کی اہلیہ اداکارہ ماہم عامر نے بھی شوہر کی پوسٹ کو شیئر کیا، ساتھ ہی بتایا کہ انہوں نے کراچی کے نجی ہسپتال میں بچی کو جنم دیا۔

جوڑے کے ہاں پہلے بچے کی پیدائش پر متعدد شوبز شخصیات اور مداحوں نے انہیں مبارک باد دیتے ہوئے ان کے لیے نیک خواہشات کا اظہار بھی کیا۔

ماہم عامر اور فیضان شیخ نے رواں ماہ کے آغاز میں ہی مداحوں کو بتایا تھا کہ ان کے ہاں جلد پہلے بچے کی پیدائش متوقع ہے۔

دونوں نے اگست 2018 میں شادی کی تھی اور دونوں کا شمار رومانوی جوڑیوں میں ہوتا ہے، دونوں نے چند ڈراموں اور دیگر منصوبوں میں ایک ساتھ کام بھی کیا ہے۔