ہانیہ عامر اور مومن ثاقب جلد اسکرین پر ساتھ نظر آئیں گے

اداکارہ و ماڈل ہانیہ عامر اور ‘مارو مجھے مارو ‘ کے ڈائیلاگ سے مشہور ہونے کے بعد اداکاری کے میدان میں قدم رکھنے والے مومن ثاقب جلد اسکرین پر ساتھ نظر آئیں گے۔

پاکستانی ہدایت کار وجاہت رؤف کی اہلیہ اور پروڈیوسر شازیہ وجاہت نے ایک انسٹاگرام میں پوسٹ میں دونوں کے ساتھ اداکاری سے متعلق بتایا۔

انہوں نے ایک ویڈیو شیئر کی جس میں ہانیہ اور مومن ثاقب کو اسکرپٹ سے ڈائیلاگز ادا کرتے ہوئے دیکھا جاسکتا ہے۔

شازیہ وجاہت نے پوسٹ کے کیپشن میں لکھا کہ ‘ جلد کچھ دلچسپ آرہا ہے، نیا آن اسکرین کپل الرٹ’۔

انہوں نے پوسٹ میں نجی چینل ہم ٹی وی کو بھی ٹیگ کیا جس سے ظاہر ہوتا ہے کہ ان کا آنے والا پروجیکٹ ہم ٹی وی پر نشر ہوگا۔

شازیہ وجاہت نے اپنی پوسٹ میں ‘ڈائریکٹوریل ڈیبیو ‘ کا ہیش ٹیگ بھی استعمال کیا اور عندیہ دیا کہ وہ اس پروجیکٹ کے ذریعے ہدایت کاری کے میدان میں قدم رکھنے جارہی ہیں۔

جس کے فوراً بعد ہی مختلف اداکاروں اور مداحوں کی جانب سے شازیہ وجاہت اور نئی آن اسکرین جوڑی کو مبارکباد دینے کا سلسلہ شروع ہوگیا۔

مومن ثاقب ان دنوں نجی چینل ہم ٹی وی کے ڈرامے ‘رقصِ بسمل’ کا حصہ ہیں اور وہ معروف پاکستانی اداکار عدنان صدیقی کی آنے والی پروڈکشن’ دم مستم’ میں بھی نظر آئیں گے۔

دوسری جانب یہ سال 2021 میں ہانیہ عامر کا پہلا پروجیکٹ ہوگا کیونکہ گزشتہ برس ‘عشقیہ’ اور ‘دلربا’ کے بعد اسکرین پر نظر نہیں آئیں۔