امیتابھ بچن کے ہمشکل اداکار فیروز خان کی دل کا دورہ پڑنے سے موت واقع ہو گئی

بالی ووڈ کے معروف سینئر اداکار امیتابھ بچن کے ہمشکل، اداکار و کامیڈین فیروز خان دل کا دورہ پڑنے کے سبب موت کے منہ میں چلے گئے۔

بھارتی میڈیا رپورٹس کے مطابق فیروز خان کچھ عرصے سے بھارتی شہر بداؤں میں مقیم تھے جہاں انہوں نے مختلف تقریبات میں پرفارم کیا تھا۔

فیروز خان نے اپنی آخری پرفارمنس 4 مئی کو دی تھی جسے خوب پذیرائی ملی تھی، فیروز خان سوشل میڈیا پر بھی سرگرم رہتے تھے۔

فیروز خان کو امیتابھ بچن جیسا گیٹ اپ بنانے، بگ بی، دلیپ کمار، شاہ رخ خان، دھرمیندر، اور سنی دیول جیسے ستاروں کی نقل کرنے کے لیے جانا جاتا تھا۔

اداکار کی اچانک موت پر بھارتی شوبز انڈسٹری سوگ میں ہے۔

بھارتی میڈیا رپورٹس کے مطابق فیروز خان کا ٹیلی ویژن اور فلموں میں ایک وسیع کیریئر تھا لیکن اِنہیں کامیڈی شو ’بھابی جی گھر پر ہیں!‘ سے حقیقی پہچان ملی تھی۔