تالا بندی، انصاف کی فراہمی کی راہ میں رکاوٹیں کھڑی کرنا وکلا کو زیب نہیں دیتا، وزیر قانون

وفاقی وزیر قانون اعظم نذیر تارڑ نے کہا ہے کہ وکلا کو زیب نہیں دیتا کہ توڑ پھوڑ میں شریک ہوں اور تالا بندی کا حصہ بنیں، انصاف کی فراہمی کی راہ میں رکاوٹیں کھڑی کریں۔

لاہور میں پنجاب بار کونسل سے خطاب کرتے ہوئے انہوں نے کہا کہ حکومت پنجاب نے بارکونسل کے لیے ایک ارب روپے مختص کیے۔

اعظم تارڑ نے کہا کہ وزیر اعلیٰ پنجاب مریم نواز کی ہدایت پرخاتون وکلا کے لیےخصوصی اقدامات کیے جارہےہیں۔

وزیر قانون نے کہا کہ گزشتہ دنوں جو لاہور بار ایسو ایشن کے معاملے پر ہوا، وہ بھی بڑا تکلیف دہ تھا، جو احکامات دیے گئے، وہ بڑی زیادتی تھی، جس طرح سے لاہور ہائی کورٹ کی طرف سے حکما کہا گیا کہ آپ دروازے بند کردیں اور کوئی وکیل اندر داخل نہیں ہوگا، یہ کام تو مارشل لا ادوار میں بھی نہیں ہوا۔

اعظم نذیر تارڑ نے کہا کہ یہ کام تو وکلا تحریک کے دنوں میں جب کہ وکلا کو انتہا درجے کی ریاستی دہشت گردی کا سامنا تھا، 3 نومبر کے بعد بھی لاہور ہائی کورٹ کا احاطہ بھی وکلا کے لیے بند نہیں تھا، میں نے اس دن وزیر اعلیٰ پنجاب سے فوری رابطہ کیا، انہوں نے فوری ایکشن لیا، انہوں نے فوری طور پر کہا کہ وکلا دہشت گرد نہیں، قانون کے رکھوالے ہیں، اگر وہ اپنے حق کے لیے احتجاج کر رہے ہیں تو یہ دہشت گردی نہیں ہے۔

انہوں نے بتایا کہ اس کے بعد تمام گرفتار وکلا کو رہا کردیا گیا، آج کے اجلاس میں یہ طے ہوگیا ہے، وزیر اعلیٰ پنجاب نے متعلقہ محکموں کو یہ ہدایات دی ہیں کہ وکلا کے احتجاج پر دہشت گردی کی دفعات 7 اے ٹی اے کو لاگو کرنے کا سلسلہ بند کردیا جائے۔

ان کا کہنا تھا کہ سپریم کورٹ کا فیصلہ ہے کہ انسداد دہشت گردی کی دفعات منظم دہشت گردی کے علاوہ ذاتی یا دیگر اس کے طرح کے کیسز میں لاگو نہیں ہوں گی، ہمارا بھی اس سلسلے میں ہمارا وعدہ ہے کہ ایسا نہیں ہوگا۔

وزیر قانون نے کہا کہ دوسری طرف ہم بھی آپ سے توقع رکھتے ہیں کہ ہم خود احتسابی بھی کریں، اپنی ڈسپلنری کمیٹی کو فعال کریں، مجھے مشکلات کا اندازہ ہے، ان کو حل کرنے کی کوشش کر رہے ہیں، جب کالا کوٹ پہن لیا، حلف نامہ دے دیا کہ آئین کے تحت کام کریں گے تو پھر زیب نہیں دیتا کہ توڑ پھوڑ میں شریک ہوں اور تالا بندی کا حصہ بنیں، انصاف کی فراہمی کی راہ میں رکاوٹیں کھڑی کریں۔

اعظم نذیر تارڑ نے کہا کہ جب کوئی بار کا ممبر غلطی کرتا ہے اور وہ جرم ہے تو بار ایسوسی ایشن حکومت کے ساتھ مل کر اس کے خلاف قانونی کارروائی کریں گی، ورنہ یہ سلسلے بند نہیں ہوں گے، اب وقت آگیا ہے کہ ہمیں یہ کڑوی باتیں بھی سوچنی ہیں، یہ ہمارے بھلے کی باتیں ہیں، یہ بہت معزز پیشہ ہے، اس پیشے نے پاکستان کی سیاسی تاریخ میں جو کردار ادا کیا ہے وہ کسی اور شعبے نے ادا نہیں کیا۔