ذی الحج کا چاند دیکھنے کے لیے مرکزی رویت ہلال کمیٹی کا اجلاس جاری

ذی الحج کا چاند دیکھنے کے لیے مرکزی رویت ہلال کمیٹی کا اجلاس کراچی میں محکمہ موسمیات کراچی کے دفتر میں جاری ہے اور محکمہ موسمیات کے مطابق چاند نظر آنے کا قوی امکان ہے۔

مرکزی رویت ہلال کمیٹی کا اجلاس کمیٹی کے چیئرمین مولانا عبدالخبیر آزاد کی زیر سربراہی جاری ہے جس میں کمیٹی کے دیگر زونل کمیٹیوں کے اراکین کے ساتھ سپارکو، وزارتِ مذہبی امور، محکمہ موسمیات سمیت دیگر نمائندے بھی شریک ہیں۔

چیف میٹرولوجسٹ سردار سرفراز کا کہنا ہے کہ ذی الحج کا چاند نظر آنے کا قوی امکان ہے اور چاند نظر آنے کا دورانیہ تقریباً 70 منٹ ہو گا۔

انہوں نے کہا کہ شام میں شہر قائد کا موسم جزوی ابرآلود ہے جبکہ ملک کے مختلف حصوں میں بھی شام کے اوقات میں کہیں مطلع صاف اور کہیں جزوی ابرآلود ہے۔

ماہرین کے مطابق رویت کے لیے چاند کی عمر کم از کم 19 گھنٹے تک ہونا ضروری ہوتی ہے اور غروب آفتاب کے وقت شمس و قمر کے درمیان فرق 74 منٹ ہوگا۔

دوسری جانب ماہر فلکیات جاوید اقبال نے بھی آج ذی الحج کا چاند نظر آنے کی پیشگوئی کرتے ہوئے کہا ہے کہ گزشتہ روز شام 5بجکر 40 منٹ پر چاند کی پیدائش ہوئی تھی اور غروب افتاب کے وقت چاند کی عمر 26 گھنٹے 45 منٹ ہو گی۔

ان کا کہنا تھا کہ سورج غروب ہوتے وقت چاند افق سے 12.5 ڈگری اونچا ہوگا اور اس وقت اس کی چوڑائی بہت زیادہ ہو گی اور ذی الحج کا چاند غروب آفتاب کے تقریباً 15 منٹ بعد بھی واضح طور پر دیکھا جا سکے گا۔

یاد رہے کہ گزشتہ روز سعودی عرب میں ذی الحج کا چاند نظر آ گیا اور وہاں حج کا رکن اعظم وقوف عرفہ 15 جون کو ادا کیا جائے گا جبکہ عیدالاضحیٰ 16جون کو ہو گی۔