بھارت میں انتہا پسندوں کے ہاتھوں مسلم جماعت کے کارکن کا بہیمانہ قتل

کیرالہ: بھارت میں گھات میں بیٹھے مسلح افراد نے نماز پڑھنے کے لیے مسجد جانے والے نوجوان کو قتل کردیا۔

بھارتی میڈیا کے مطابق ریاست کیرالہ میں انڈین یونین مسلم لیگ کے 38 سالہ کارکن اسحاق کو مسجد جاتے ہوئے مسلح افراد نے گھیر کر بہیمانہ تشدد کا نشانہ بنایا اور فائرنگ کرکے نوجوان کو شہید کرکے فرار ہوگئے۔

عینی شاہدین کا کہنا ہے کہ اسحاق کو شدید زخمی حالت میں اسپتال لے جایا گیا تاہم دوران علاج خون زیادہ بہہ جانے کے باعث وہ خالق حقیقی سے جاملا۔ پولیس نے انڈین پینل کوڈ کی شق 302 کے تحت مقدمہ درج کرلیا۔

واضح رہے کہ بھارت میں مودی سرکار کے دوبارہ برسراقتدار آنے کے بعد سے مسلمانوں اور اقلیتیوں کے پر مشتعل ہجوم کے بہیمانہ تشدد کے واقعات میں اضافہ ہوا ہے اور ایمنسٹی انٹرنیشنل کے مطابق رواں برس کے پہلے 6 ماہ میں نفرت آمیز 181 واقعات رونما ہوئے ہیں۔