کردار نبھانے کیلئے امیتابھ، شتروگھن سے انسپریشن لی، منوج باجپائی

بھارتی اداکار منوج باجپائی نے کہا ہے کہ انہوں نے اپنی آئندہ آنے والی فلم میں کردار نبھانے کےلیے امیتابھ بچن، شتروگھن سنہا اور ونود کھنہ جیسے بڑے اسٹارز سے انسپریشن حاصل کی۔ 

واضح رہے کہ اپنی نئی آنے والی فلم بھیا جی میں منوج باجپائی ایک عوامی ہیرو جیسا کردار نبھا رہے ہیں۔

فلم میں منوج باجپائی ایک ایسے بھائی بنیں گے جو اپنے بھائی کی موت کا بدلہ لے گا۔

 اپنے ایک انٹرویو کے دوران منوج باجپائی کا کہنا تھا کہ میں کمرشل فلمیں دیکھ کر بڑا ہوا ہوں اور ان میں کام کرنے والے تمام بڑے اسٹارز جیسے امیتابھ بچن، ونود کھنہ، شتروگھن سنہا، سب میری انسپریشن ہیں اور یہ سب لاشعوری طور پر ہوا۔

منوج باجپائی کا کہنا تھا کہ میں جانتا تھا کہ مجھے اسکرین پر پُرکشش نظر آنے کےلیے کچھ چیزیں کرنی پڑیں گی تاکہ ہر کوئی ‘بھیا جی’ جیسی شخصیت بننا چاہے۔

انکا کہنا تھا کہ یہ بھیا جی لوگوں کےلیے انسپریشن ہے، لوگوں کو اسے دیکھنا چاہیے اور یہی وجہ ہے کہ میں نے یہ کردار نبھانے کےلیے تمام طریقوں کو استعمال کیا۔

منوج باجپائی کا یہ بھی کہنا تھا کہ بچن میں جب بھی وہ ایکشن فلم دیکھتے تھے تو انہیں ایسا لگتا تھا کہ وہ ایک ہیرو ہیں۔

جب ان سے سوال کیا گیا کہ وہ اپنے آپ کو ایک سپر اسٹار کے طور پر دیکھتے ہیں یا صرف ایکشن اسٹار کے طور پر؟ تو انہوں نے جواب دیا کہ وہ خود کو ایک دیسی اداکار سمجھتے ہیں۔

انکا کہنا تھا کہ میری خواہش ہے کہ ہماری ثقافت، گاؤں اور زمین کی کہانی مین اسٹریم سنیما میں آنی چاہیے۔

منوج باجپائی نے یہ بھی کہا کہ ہمارے اداکاروں کو ہماری طرح ہی نظر آنا چاہیے کسی مغربی ملک کے اداکار کی طرح نظر نہیں۔