برطانوی کیوریٹر نیشنل اسٹیڈیم میں وکٹوں کی تیاری کے سامان کی خستہ حالی پر حیران

پاکستان میں معیاری کرکٹ پچز کی تیاری میں مدد کے لیے انٹرنیشنل کرکٹ کونسل (آئی سی سی) کے کنسلٹنٹ برطانوی ماہر کیوریٹر اینڈی ایٹکنسن کراچی پہنچ گئے ہیں۔

کراچی پہنچ کر اینڈی ایٹکنسن نے نیشنل اسٹیڈیم کی پیچز کا معائنہ کیا، گراؤنڈ اسٹاف سے ملاقات کی اور اسٹیڈیم میں وکٹوں کی تیاری کے لیے رکھے گئے سامان کی خستہ حالی پر حیرت کا بھی اظہار کیا۔

کراچی کے بعد غیر ملکی کیوریٹر ملتان، پنڈی اور لاہور سینٹرز کا دورہ کریں گے اور پچزکے بارے میں پاکستان کرکٹ بورڈ کو تفصیلی رپورٹ دیں گے۔

 علاوہ ازیں وہ پی سی بی کو  تجاویز دیں گے کہ پچز کی کوالٹی میں کس طرح بہتری لائی جاسکتی ہے۔

اینڈی پہلی بار 2001 میں پاکستان آئے تھے، 2004 اور 2006 میں بھارت کی سیریز کے لیے بھی وہ پاکستان آچکے ہیں۔